२०८३ श्रावण २८, बिहीबार १७:०७
सरकारले दुई दिनको सार्वजनिक बिदालाई पुनरावलोकन गर्ने कुनै तयारी नभएको स्पष्ट पारेको छ ।
बिहीबार राष्ट्रियसभा बैठकमा प्रधानमन्त्री बालेन्द्र शाहको तर्फबाट प्रधानमन्त्री तथा मन्त्रिपरिषद्को कार्यालयसँग सम्वन्धित सांसदहरुको प्रश्नको जवाफ दिदै न्याय तथा संसदीय मामिला मन्त्री सोविता गौतमले दुई दिनको सार्वजनिक बिदालाई पुनरावलोकन गर्ने कुनै पनि निर्णय वा तयारी नभएको स्पष्ट पार्नुभएको हो ।
सातामा दुई दिनको विदाले सार्वजनिक प्रशासनलाई परिणाममुखी बनाउन, उर्जा -विद्युत्, सवारी इन्धन) तथा प्रशासनिक खर्चमा मितव्ययिता कायम गर्न सहयोग पुगेको उहाले बताउनुभयो । साथै उहाले कर्मचारी तथा श्रमिकको कार्यजीवन सन्तुलन अभिवृद्धि हुनुका साथै मनोबल, कार्यकुशलता र उत्पादकत्वमा सकारात्मक प्रभाव परेको दावी गर्नुभयो ।
दुई दिनको विदाका कारण छोटो अवधिको भ्रमण बढेर आन्तरिक पर्यटन प्रवर्धन हुनुका साथै स्थानीय अर्थतन्त्र र आर्थिक गतिविधि चलायमान बनाउन मद्दत पुगेको उहाले बताउनुभयो ।
बैठकमा राष्ट्रियसभा सदस्य विष्णु बहादुर विश्वकर्माले सातामा दुई दिन सार्वजनिक विदा दिइनुले के कति फाइदा वा नोक्सान भएको छ भन्दै प्रश्न गर्नुभएको थियो ।
प्रतिनिधिसभा बैठकमा प्रधानमन्त्रीसंग नियमित प्रश्नउत्तरको कार्यक्रम राख्न बिपक्षी दलले माग गरिरहेका बेला राष्ट्रियसभामा पनि प्रधानमन्त्री कार्यालयसंग सम्बन्धीत सांसदको प्रश्नको उत्तर कानून गौतमले दिनुभएको हो ।
